Konstituimi i Kuvendit të Kosovës ka dështuar për të 31-tën herë me radhë, edhe të premten. Gjatë sesioneve të kaluara, deputetët zakonisht e përfundonin punën pranverore në fund të muajit korrik ose në fillim të gushtit.

Mirëpo, në një situatë kur Kuvendi nuk është i konstituar dhe nuk ka sesione të rregullta, një praktikë e tillë nuk mund të konsiderohet normale.

Njohës të çështjeve të drejtësisë vlerësojnë se nëse deputetët shkojnë në pushimet verore pa u konstituar Kuvendi, kjo do të përbënte një prej akteve më të turpshme.

Edhe pse pushimi u garantohet përmes Kushtetutës së Kosovës, një veprim i tillë, sipas tyre, nuk do të ishte as i duhur dhe as etik pa funksionalizimin e Kuvendit.

Anton Nrecaj, këshilltar i lartë në Qendrën për Ndihmë Juridike dhe Zhvillim Rajonal dhe njëherësh jurist, deklaron për Albanian Post se vendi ndodhet në një situatë ku deputetët e zgjedhur me votat e qytetarëve po e keqpërdorin statusin e tyre.

“Tani jemi në një situatë ku deputetët e zgjedhur me votat e qytetarëve, përveç që po shkelin mbi parimet e barazisë dhe drejtësisë sociale, po abuzojnë edhe me statusin e tyre, duke rrënuar aspektin e drejtësisë sociale dhe, më keq akoma, duke dëmtuar demokracinë e vendit”.

“Shkuarja në pushime verore pa u konstituar Kuvendi do të ishte paturpësia më e madhe pas luftës dhe një papërgjegjësi morale e deputetëve të Kuvendit”, deklaron Nrecaj për AP.

Ai sqaroi se, edhe nëse Kuvendi nuk është funksional, deputetët formalisht mbesin në detyrë deri në përfundimin e mandatit të tyre, i cili fillon nga momenti i certifikimit dhe përfundon në ditën e certifikimit të përbërjes së re të Kuvendit.

“Kjo do të thotë se ata vazhdojnë të përfitojnë nga të drejtat e tyre financiare, përfshirë pagën dhe pushimin e paguar, për aq kohë sa mandati i tyre është i vlefshëm”.

Megjithatë, Nrecaj rikujton se Gjykata Kushtetuese ka vlerësuar si antikushtetuese disa dispozita ligjore që lidhen me pensionet dhe përfitimet financiare të zyrtarëve të lartë, duke i konsideruar të papërputhshme me parimet e barazisë dhe drejtësisë sociale.

Në linjë të njëjtë është edhe avokati Ardian Bajraktari, i cili e konsideron të papranueshme që deputetët të shkojnë në pushime verore pa gjetur zgjidhje për ngërçin institucional.

“Kushtetuta parasheh dy sesione në vit, por ato janë sesione të rregullta. Po ashtu, praktika ka treguar që Kryetari i Kuvendit e shpall të mbyllur sesionin me seancë, dhe po ashtu e hap sesionin e ri me seancë. Në këtë rast, nuk po flasim për sesione të rregullta, sepse Kuvendi nuk është i konstituar”, thotë Bajraktari për Albanian Post.

Sipas tij, deputetët po tregojnë gatishmëri vetëm për çështjet që lidhen me pushimet, e jo për zgjidhjen e bllokadës.

“Për gjetjen e zgjidhjeve duhet reflektim dhe vullnet nga subjektet politike. Deri më tani, këtë vullnet e kemi parë vetëm për sa i përket ndryshimit të rutinës për pushimet verore”.

Sa i përket dërgimit të çështjes në Gjykatën Kushtetuese, lidhur me votimin e fshehtë për zgjedhjen e Kryetarit të Kuvendit, Bajraktari e sheh si një problem kryekëput politik.

“Megjithatë, mbetet të shihet se si do të rrjedhë procesi, me shpresë që edhe Gjykata Kushtetuese do të dalë me një qëndrim lidhur me kërkesën që i është bërë. Edhe pse, për të qenë i sinqertë, nuk pres shumë nga kjo Gjykatë, sepse në fund të fundit, problemi është politik”.

Katër muaj pas zgjedhjeve të 9 shkurtit, deputetët e legjislaturës së nëntë, nuk kanë arritur ta konstituojë Kuvendin e Kosovës, as në përpjekjen e 31-të.

Të premten, kryesuesi i seancës konstituive të Kuvendit të Kosovës, Avni Dehari, ka përmbyllur seancën konstituive të Kuvendit të Kosovës në mungesë të kuorumit, meqë vetëm 47 deputetë votuan për që të ndryshojë metoda e votimit nga e hapur në atë të fshehtë për kryekuvendar.

Dehari propozoi që edhe në përpjekjen e 31-të të konstituimit të Kuvendit të Kosovës të vazhdohet me votim të fshehtë për të zgjedhur kryekuvendarin.

Partia Demokratike e Kosovës, Lidhja Demokratike e Kosovës, Aleanca për Ardhmërinë e Kosovës dhe Lista Serbe kanë refuzuar sërish që të propozojnë një përfaqësues që do të siguronte mbarëvajtjen e votimit të fshehtë.

Seanca e radhës do të mbahet më 15 qershor në orën 11:00.

Zgjedhjet parlamentare në Kosovë u mbajtën më 9 shkurt, ndërsa seanca e parë pas shpalljes së rezultateve përfundimtare u mbajt më 15 prill.

Katër muaj, 31 dështime

Pushimet verore pa Kuvend, papërgjegjësi morale

Altina Marmullaku

Të fundit

Aktuale